同去学校路上随聊记

今朝係吾来学校个第三日矣，前面两日都係用来考试个，今日正係正式上课。哪样子讲呢，在学校埕几日，也基本习惯开敢样子个忙碌生活矣啦，记得吾起初收到通知亚时，係非常个不情不愿个，毕竟在屋家开咁多日矣，早就以为冇使爱来学校矣噜，哪人又知得其爱来学校也？！简直係不敢相信呀！所以讲嘛，吾係非常个、非啲个愤慨个！但也冇得办法啊，屋家人肯定係爱吾来学校读书个，冇来也着来个啦。

在4月7日个清早朝，阿婆就去拜神，吾著在睡紧觉才，因为参夜两三点正睡熟开。阿婆拜齐开神转来亚时，差不多有八点其矣哇，然后著历历切切个去煮朝矣。同时呢，吾也䟘身矣，漱口擦牙后，就穰所有爱带去学校个东西拾好先。等拾齐东西矣，正慢慢个下楼梯，睥只凳来坐，静盼阿婆渠人煮好朝。约莫过开十零分钟，著得朝食矣。吾跟首去碗栈摞碗同筷子，盏出台盆，去灶下舀饭食。菜倒系无有木該奖正个，著不过系一碟鸡肉同一盘青菜吆。敢啱介时吾也无想食該东西，著僅知扒开几口饭，夹几粒扣肉来食，算解决矣。

食齐矣，吾上二楼摞书同纸箱下到下背去。等吾行到塯亚埕时，就见到原君渠人早早著来到矣。行到大路唇边，渠人见倒吾，就向吾打招呼，吾也颔头应。背尾个哦，好像也无有木該必要讲哇，吾怀疑再像前面个亚样子去叙述个话，就无有木該值得读个啦，同流水帐差不多矣。

在去学校个路上，吾同原君讲下话，聊个也无外乎学习也、打工也、等之类个，不过讲到个事情同人倒系爱叹息不已，完完全全系吂曾念倒过渠人也晓无读书个哇，看来农村中更多个系无奈同艰苦、悲惨呀。尽使吾也村巷个其中一只人嘛，由于吾长年在落背读书，几少转过屋家个原故，一粒儿无知得这般事。甚至好多东西吾著忘却矣。吾讲分尔听哦，起先吾系十分个无愿去高中个啦，为什么呢？著係因为同吾读书个亚僬儿董去打工矣，独独吾一只人在读书，有介搭煞个哦？故所讲嘛，去读书吾系无愿个，再加上吾无好交接以及普通话半烂灿个原因，迒过无愿去木該高中矣啦。果不出所料，高中或许算得上读书生涯中最为艰难个时段矣啦，无融入得落班级，也无想写作业，也无有木該动力去听课等，无疑个系：吾爱老师渠人非常个无满意，都认为吾也不过系只不思进取个学生罢矣。唉~无止这般呢，还有吾个普通话系实在拿无上台面，爱吾几乎系经常着忽略个对象。渐渐个，老师渠人也无再撒吾，反之吾感倒心安。种种高中经历个，爱吾过得十分苦痛，但又无有木該法子矣啦。唯一可以做个，著係爱吾捱到毕业吆矣。好得个系今那快毕业矣。唉，真个係冇容易呀吾咁多年来。

学校三年，常常系爱吾冇得冇讲通用语，代价係木該呢？係我方言个言语能力在猛降，好多个词语，特别系句法，差不多忘齐欸矣。为此，吾个人系感到非常个无满同焗火个。在吾亟只班，本就无有几多只人晓讲客家话，反之个係木該？系更多更大比例系、县唇边晓讲本地话个矣啦。正由于亟只，吾想讲那怕、也无有相对应个条件去讲客家啦！尔可以想下儿个咧，冇知有几难何呦~！唉，讲䟘身来哦，都系一溚辛酸一溚泪。

难怪乎当时吾听开原君个话后，心肚系几何复杂同感慨矣啦。更多个系，体会倒渠人个无奈何同渠人个苦涩啦。非啲同情同怜惜渠人，吾个人认为哦，最起码读齐义务教育正去打工嘛，咁妮著去打工，著像大人渠人讲个亚样：「爱打几久个工耶？打工打倒老？繁澜吁~」故吾系无认可渠人咁细著去打工矣啦。但念倒渠人也无有继续读书个心思后，正感倒一丝丝个释然罢矣。

讲䟘身来，迄今咁多年矣，吾著偌少见过吾细时嫽个阵矣，渠人出去打工开咁久矣，吾又读开咁久个书，同渠人个联络还过紧得紧少矣噜。为此吾系表示偌遗憾个。吾有成时，也晓去念亟只问题：为該介时吾爱读尖子班呢？为該介时吾又在二中呢？还有吾今摆见倒渠人矣，又应该讲的木該正好呢？又应该唓的該正合适呢？其实吾心里背，系彷徨同惊恐个。加上吾个内向性子缘故，往往一件看似简单个事情著爱念好久，正下得定决心。故所，在吂曾见倒亚时，著紧念紧爱见，反之在渠人在吾个眼前时，介种心思倒无有咁强烈矣。嗯，吾就系敢样子出奇个咧。相反个，还係有的惶矣，有亚种心惊惊个感觉矣。无得无讲，吾系亚种胆怯、怯弱个人，有的社交恐惶症状。

並无系讲吾系只缺陷个人，著不过系吾太怕生矣，着实系无曾知得样般去表达自家爱讲个话矣啦。假使吾系可以像平常人样个话，吾也冇至于行到今田地。或许圆滑世故个人，在亟只社会迒过受欢迎哇。对于吾种人，太过难困矣、真个！