方言现象杂记

做物介亚的在城市停个父母爱刻意个同亚僬儿讲普通话呢？完全可以先教亚僬儿讲母语，然后正讲普通话个嘛。吾阿叔儿个妹子今下就係先讲普通话个，搞得老妹连阿婆讲个话著无听得识，尔讲咁样子有物介意思嘛，我对于这种现象表示深深个担忧。我知，汝人想爱自家子女能读识书，今摆能出人头地，远离落后个家乡。可係，汝人教细人讲普通话，无教其讲母语个行为，係完全无可取个。我真个，希望父母能改变这一观念，因为汝子女讲普通话，同考上大学、读识书无有直接、绝对个联系……

我知汝人亚辈，读个书无係佇多，故所汝人十分希望自家子女能读识的书。但打小著教普通话，无教其讲母语个行为，本身就係大错特错个。我无知汝人在哪埕听倒人家讲这一做法有利于学习个。我著能讲，这真个係荒唐至极，不可理喻。

我觉得，渠人係咁样子惗个哇——自家在城市买开房，有开一定收入，也有车矣，著想爱千方百计个同自家出身个落后家乡摆脱关系，想爱变成真正意义个城市人。同时，也有跟风个因素在底背。因为呀，渠人可能著係，跟人家亚的有钱个老板学个呢。亚的老板显然就係渠人认为个城市人。

唉，惗惗著觉得悲哀至极。明明自家著咁落力个去做工，终于到出人头地开个时境，捩头著嫌自家讲个方言土，自家讲个话无跟得上时代个脚步矣哇。真係讽刺亢該呀。也由于自家对方言个嫌之嫌北，正觉得自家个后代无有必要去学习方言矣，转而教子女学习普通话。

何必呢？何必爱咁样子做呢？今摆哦，可能著係汝子女怨尔介时无教其讲客家话！！孬死尔，怨死尔！所以，做事爱留后路，无能咁极端个啦。无个话，死尔著无知哪样子死。